Marneuli və Bolnisidə gərginlik aradan qaldırılır - FÖVQƏLADƏ VƏZİYYƏT REJİMİ DAVAM EDİR

Baxış sayı:
361

“Gürcüstanda karantin zonalarının elan edildiyi Marneuli və Bolnisidə ictimaiyyətin məlumatlandırılması ilə bağlı bəzi çətinliklər olub”.

Bu barədə Gürcüstan baş nazirinin mətbuat katibi İrakli Çikovani bildirib.

Onun sözlərinə görə, bu problem artıq aradan qaldırılıb: “Marneuli və Bolnisidə fövqəladə vəziyyət 48 saatdır elan olunub. Həm hüquq mühafizə orqanları, həm də hərbçilər çox səmərəli iş aparırlar. Təcrid tam təmin edilir və ictimaiyyətə də ətraflı məlumat təqdim olunur”.

Hökumət rəsmisi hər iki rayonda vəziyyətin sakit olduğunu qeyd edub: “Marneuli və Bolnisidəki həmvətəndaşlarımız mövcud vəziyyətdə sakit davranırlar. Hökumət adından onlara minnətdarlığımı bildirirəm. Görülən tədbirlər onların hər biri və bütövlükdə Gürcüstan əhalisi üçün zəruri olub”.

İ.Çikovani bildirib ki, hər iki rayonda 20 mindən çox yerli sakin tibbi yoxlanışdan keçirilib və onların yalnız 25-də yüksək hərarət qeydə alınıb: “Hazırda həmin şəxslər tibbi nəzarətdə saxlanılır”.

Mətbuat katibi Marneuli və Bolnisi əhalisinin ərzaq məhsulları ilə təminatında heç bir problemin olmadığını da qeyd edib.