“İdlib hərəkatı artıq an məsələsidir” - ƏRDOĞANDAN XƏBƏRDALIQ

Baxış sayı:
769

“İdlibdə rejimin qüvvələrini geri çəkməsi üçün artıq son günlərdir. Biz sonuncu xəbərdarlığımızı edirik. İdlib hərəkatı artıq an məsələsidir”.
 
“Qafqazinfo”nun “Hürriyət”ə istinadən verdiyi xəbərə görə, bu barədə Türkiyə Prezidenti Rəcəb Tayyib Ərdoğan AKP-nin partiya toplantısında İdlibdəki vəziyyətlə bağlı açıqlamasında bildirib.
 
“İdlibdə rejimin hücumlarına son verəcəyik. İdlibi rejimə və onu cəsarətləndirənlərə verməyəcəyik. Hər əməliyyatda olduğu kimi “bir gecə anidən gələ bilərik” deyirik. İdlib hərəkatı an məsələsidir. Nə bahasına olur-olsun, İdlibi həm Türkiyə, həm də bölgə xalqına görə təhlükəsiz bir əraziyə çevirməkdə haqlıyıq”, - deyə Ərdoğan sözlərinə əlavə edib.
 
Xatırladaq ki, Prezident Rəcəb Tayyib Ərdoğan fevralın 12-də AKP-nin partiya toplantısında çıxışı zamanı Türkiyə ordusunun İdlib vilayəti və Soçi anlaşması ilə müəyyən edilmiş deeskalasiya zonası ilə kifayətlənməyərək Bəşər Əsəd rejiminə bağlı qüvvələrə hər yerdə zərbə endirəcəyini qeyd etmişdi: “Bu gündən etibarən əsgərlərimizə zərər gəldiyi halda İdlib və Soçi anlaşması sərhədləri ilə kifayətlənməyib rejim qüvvələrini hər yerdə vuracağımızı buradan elan edirəm. Bu müddətdə müşahidə nöqtələrində Türkiyəni hədəf alan hər kəs bunun əvəzini yalnız hücum sahəsində deyil, hər yerdə ödəyəcəyini bilməlidir”.